DÍA DE ROSALÍA

O alumnado de 1º ESO conmemora o Día de Rosalía co recitado dos seus poemas e posa diante do cartel elaborado coa imaxe de Uxía Oviedo de Dios, alumna de 2º Bacharelato.

O AMOR NOS ESCUROS DÍAS DE BIRKENAU

Os membros do Club de lectura sénior reúnense para pór en común as impresións e valoracións sobre a novela O amor nos escuros días de Birkenau de Alberto Canal. Como non podía ser doutra maneira nunha obra que describe a barbarie xenocidia, adentrámonos nun mundo de medo, torturas, enfermidade, odio, traizóns, morte... pero tamén de amor ("A mirada", "O desexo de intimar" e "A necesidade de tanscender"), de solidariedade, de esperanza a través da rebelión e de arte (o teatro, a fotografía, a música e a lectura) na busca da liberdade.

O encontro contou ademais coa presenza do autor que respondeu todas as nosas preguntas e nos proporcionou valiosa información sobre o proceso creativo, dende a idea que xorde na súa viaxe aos campos de concentración e exterminio situados na Alta Silesia, a documentación empregada e as decisións na caracterización dos personaxes. 

En definitiva, unha lectura e un encontro valiosos que o club de lectura recomenda.

 

DÍA DA PAZ

O alumnado de 1º ESO está a traballar a definición de paz e outros conceptos relacionados co Dicionario da Real Academia Galega e ademais aprendeu a manexar o xerador de nubes de palabras WordClouds. Eis a súa exposición con Palabras de Paz