martes, 24 de febrero de 2015

DÍA DE ROSALÍA

O alumnado de 1º ESO achegouse á figura e obra de Rosalía de Castro para a conmemoración deste ano. 
Tras a busca de información e a cita das fontes, elixiron un poema da autora para recitar na biblioteca, baixo o lema Eu son Rosalía da Asociación de Escritores en Lingua Galega, en cuxo manifesto podemos ler:

Ánimo, compañeiras! Arriba todas, rapaciñas do lugar. Nós somos arpa de soio dúas cordas, a imaxinación i o sentimento. Que o seu son se disolva, pois, nunha mesma música, nun himno común. Porque celebrar o nacemento de Rosalía de Castro é festexar o perpetuo renacer deste país que nos acolle e identifica; é aturuxar con orgullo na nosa lingua e sentir que formamos parte dunha comunidade poética, por enriba de calquera circunstancia. 
Por enriba de calquera circunstancia todas as galegas e galegos somos Rosalía! E hoxe, máis que nunca, debemos deixar que a súa voz fale en cada unha, en cada un de nós.

RECITADO ROSALÍA - Kizoa Movie Maker

viernes, 20 de febrero de 2015

MUSEO DE PONTEVEDRA

O alumnado de 2º Bacharelato achégase ao Museo de Pontevedra para realizar unha visita guiada polo sexto edificio emprazado detrás da igrexa parroquial de San Bartolomeu e do edificio Sarmiento co que comunica. 
As vinte e tres salas de exposición permanente proporcionan un percorrido pola evolución da arte galega dende o gótico ata a actualidade, así como as manifestacións doutros lugares de España, dende os gravados de Goya ata obras de mediados do século XX.
Obviamente, unha parada especial para observar e gozar as obras de Afonso Daniel Rodríguez Castelao.



viernes, 6 de febrero de 2015

TERTULIAS LITERARIAS DE OURENSE

Un curso máis, o alumnado do club de lectura Pasamos Páxina acode ás Tertulias Literarias de Ourense para compartir a lectura con adolescentes doutros centros da provincia. Nesta ocasión, os compañeiros foron as alumnas e alumnos do IES Eduardo Blanco Amor de Ourense.
A obra de Clara Sánchez, Lo que esconde tu nombre, Premio Nadal 2010, proporcionou moitos aspectos para comentar, tanto os relativos ao punto de vista, estrutura e caracterización dos personaxes, coma os referentes aos temas: nazismo, neonazismo, memoria, xustiza e amor. E as lectoras e lectores dos dous centros participaron activamente. Parabéns a todas e todos.